... أمنا...(1)

من طرف **Admin** الخميس ديسمبر 04, 2008 2:15 pm

مصر دى أمنا
اى نعم هى أم
غصب عننا
لكن مالاقيتش
الامان الا هنا
اوعوا تصدقونى!!
أمنا مفعمة
بالحنان والقسوة
ويمكن كمان
جذوة تلهب حلقنا
اوعوا تصدقونى!!
أمنا غير البحر
لونها ليه
ما يكنش ده مننا
اوعوا تصدقونى!!
أمنا نخلة عالية
فى السماء ثمرها
طرى وعذب
لغيرنا مش لنا
اوعوا تصدقونى!!
أمنا ظلها فارش
الارض بساط
ضيافة لكل
الناس الا احنا
اوعوا تصدقونى!!
أمنا واحة رخاء
وراحة لكل البشر
بس هى نسيانا
اوعوا تصدقونى!!
طفلتى بتموت
ومش لاقى الدواء
وانا جسمى بيترعش
مش لاقى الغطاء
وامى بتصرخ
وانا مش سامع صراخها
ولا هى بتمسح دمعتى
ولا بتطبطب على
وتاخدنى فى حضنها
زى زمان
اوعوا تصدقونى !!
دى مصر حساسة
وخضرة
وارضها جامدة
ورجلى حافية
مستنى منحة من السلطان
اصلى استلفت امبارح 3 جنيه
علشان السجائر والبخور
ومدد ..على طول المدد
ودائما عمار يا مصر
واوعوا تصدقونى!!

بقلم/طارق صقر